د پښتون ژغورنې غورځنګ مشر منظور پښتین وایي، پر پښتنه خاوره روانه ترهګري دې ژر تر ژره ودرول شي. نوموړي ویلي چې د پاکستان استخباراتي ادارې زموږ پټې خبرې اوري خو په باجوړ او وزیرستان کې روانې هدفي وژنې بیا د نامعلومو کسانو کار بولي.
پښتین پاکستاني حکومته ته خطاب کې ویلي، په وزیرستان کې هیڅ داسې ځای نهشته چې هغه له پوځ او استخباراتي ادارو څخه پټ وي، نو بیا څه ډول ترهګر د تورو شیشو موټرو کې راځي او هدفي وژنې کوي.
پښتین زیاته کړې، په پښتنه خاوره ترهګري یو ځل بیا زور اخیستی دی او ورځ تر بلې پکې وضعیت د خرابېدو پر لور روان دی. هغه پاکستاني ادارې له ترهګرو سره په لاس لرلو تورنې کړې او زیاته کړې یې ده چې روانه ترهګري دې ژر تر ژره ودرول شي.
