د هېواد پخواني ولسمشر حامد کرزي ویلي چې د شهیدانو د ارمانونو پوره کولو په موخه باید روانه جګړه ختمه او بین الافغاني خبرې ژر پیل شي.
د نوموړي له مطبوعاتي دفتره د شهیدانو اوونۍ په مناسبت خپرې شوې خبرپاڼه کې راغلي، هیله ده چې بین الافغاني مذاکرات ژر پیل شي، څو له دې وروسته افغانان د خپلو عزیزانو د لاسه ورکولو غم ونه ویني او په دې ډول د شهیدانو ارمانونو ته عملي بڼه ورکړل شي.
خبرپاڼه کې د کرزي له قوله راغلي، د احمد شاه مسعود ترڅنګ، د ګڼو نور نوم ورکو شهیدانو د قربانیو باید قدرداني وشي، ځکه د ده په خبره؛ هغوی د افغانستان د استقلال او ارضي تمامیت لپاره قرباني ورکړې او هیله یې هېواد کې تلپاتې سوله وه.
