جمعیت اسلامي: د موقت حکومت هرکلی کوو، په دې حکوت کې د نظام د بدلیدو مسئله نه ده مطرح، یو څو څیرې بدلیږي.
ولسمشر غني او هغه ته نږدې کسان د سولې پروسې د پرمختګ مخه نیسي. نیویارک ټایمز ورځپانې په یوه راپور کې د ځینو سرچینو په حواله لیکي، چې دوحه کې د سولې مذاکرات له پرمختګونو سره مخ دي او ټولو ترې هرکلی هم کړی دی، خو ولسمشر غني او د هغه نږدې کسان د سولې د وروستیو پرمختګونو د مخنیوي هڅې کوي.
نیویارک ټایمز ورځپاڼه لیکي: «ولسمشر اشرف غني د مذاکراتو چوکاټ لپاره د ازمایښتي توافق په حال کې دی، خو نوموړي ته نږدې کسان توافق نږدې نه ګڼي. ولسمشر او نږدې کسان یې په داسې حال کې د سولې پروسې د مخنیوي هڅې کوي، چې له څو میاشتیني ځنډ وروسته د سولې هلې ځلې له څرګند پرمختګ سره مخ شوي دي.»
نیویارک ټایمز لیکي، چې مذاکراتو کې د پرمختګ په تړاو له راپورونو وروسته حکومت په عاجله توګه په مذاکراتو کې د پرمختګ له ادعا څخه په شا شو او ټینګار یې وکړ چې د توافق د جزئیاتو په اړه نور کار ته اړتیا ده.
په دې راپور کې یادونه شوې ده چې لوېدیځ هیوادونه د سولې په پروسه کې د ملي مصالحې عالي شورا د رئیس عبدالله عبدالله نقش ته په تمه دي: «ځینې حکومتي چارواکی په عاجل ډول په مذاکراتو کې د پرمختګ خبرونو څخه په شا شول او ترڅنګ یې د توافق د جزئیاتو په اړه نور کار ضروري وباله. طالبانو باندې د لوېدیځو هیوادونو فشار و چې د بنبست ماتیدو مسئله اعلان کړي. لوېدیځ هیوادونه د مذاکراتو په دې پړاو کې د ملي مصالحې عالي شورا رئیس غالب نقش ته په تمه دي.»
د سولې له پروسې باخبره کسان وايي، ولسمشر غني او هغه ته نږدې کسان د سولې په پروسه کې له تازه پرمختګونو راضي نه دي او د دې بهیر د ناکامولو هڅې کوي.
د چارو شنونکی وايي، د دې مقالې محتوا، د امریکايي او اروپايي دیپلوماتانو مشاهدات دي چې په دوحه کې دسولې خبرې له نږدې څاري او دا تاریخي مقاله د ځینو مذاکره کوونکو مسوولیت رفع کوي او یو شمیر نورو کسانو ته مسوولیت راجع کوي، چې ولې په افغانستان کې سوله ژر نه راځی؟
د سولې له چارو باخبره کس ملا عبدالسلام ضعیف کابل نیوز ته ویلي: «د حکومت له خوا هم اعلان شول، خو ځینې هغه د سولې هیئت چې دی یو څه د تردد خبره په کې کوي. د دوی موقف داسې دی چې پوره واضح نه دی.»
شنونکي وايي، چې د سولې مذاکراتو کې د پرمختګ په صورت کې له واک څخه د ولسمشر غني د لرې کیدو مسئله مطرح کیږی، خو ولسمشر غني په یوه طرحه کې د پاکستان له صدر اعظم سره یې شریکه کړې، ټینګار کړی چې په دې شرط له دغو پرمختګونو سره مخالفت نه کوی، چې نوموړي د موقت حکومت په راس کې راشي.
د صلاح الدین رباني په مشرۍ جمعیت هم د یوې اعلامیې په خپرولو سره د موقت حکومت د جوړیدو هرکلی او ویلي یې دي چې په دې حکومت کې د نظام د بدلیدو مسئله نه ده مطرح او یو څو څیرې بدلیږي.
د یکشنبې په ورځ کابل نیوز خبر خپور کړ چې ولسمشر غني د فشارونو په نتیجه کې د دوحې توافقات نهايي بللي، خو د ولسمشر ویاند وايي چې دوحه تر اوسه طرزالعمل نهايي نه دی او د سولې پروسې سره د ولسمشر غني د مخالفت په تړاو د نیویارک ټایمز راپور ناسم دی.
