په کابل کې د تروریستي او جنايي پېښو له زیاتوالي سره چې کله د دې ښار امنیتي چارې د ولسمشر لومړي مرستیال ته وسپارل شوې، تمه دا وه چې د ښار وضعیت به ارام شي، اما لیدل کیږي چې د کابل امنیت لا هم نه دی ښه شوی. پرون د کابل ښار په بیلابیلو سیمو شاوخوا لس توغندي وویشتل شول چې په کې یو تن ووژل شو او یو شمیر نور ټپیان شول. د دې ترڅنګ په پنځمه، شپږمه او لسمه امنیتي حوزه کې هم په بیلابیلو جنايي پېښو درې تنه وژل شوي دي. د دې ترڅنګ پر خواله رسنیو ځینې نور راپورونه هم شته چې له یو شمیر هیوادوالو څخه غلو پیسې او مبایلونه هم اخیستي دي.
اما ولې د کابل ښار امنیتي وضعیت نه ښه کیږي؟ دا پوښتنه مو ځکه مطرح کړه چې د ولسمشر د لومړي مرستیال په مشرۍ د شپږنیمو بجو امنیتي ټیم هڅو هم نتیجه نه ده ورکړې او د کابل ښار لا هم تر لوړو امنیتي او جنايي ګواښونو لاندې دی. تر دې وړاندې تمه دا وه چې د صالح په مشرۍ امنیتي ټیم به د کابل د امنیت د ښه والي لپاره د امنیتي ادارو ترمنځ د همغږۍ په رامنځته کولو سره د دې ښار امنیتي وضعیت بهتر کړي، اما د دوی هڅې هم د اوبو پر مخ د نقش کاږل دي. اما علت یې څه کیدای شي؟
د پورته پوښتنې د ځواب لپاره دومره ویلی شو چې د کابل امنیتي وضعیت یوازې د کابل په مسایلو پورې نه شي محدودیدای، بلکې د دې ښار امنیتي وضعیت د دې ښار د ولسوالیو او څنګلورو ولایتونو له امنیتي وضعیت سره هم نیغ په نیغه اړیکه لري. له بده مرغه چې د کابل ښار ولسوالۍ دمګړۍ د نا امنیو له اندېښمنوونکې او ویروونکې څپې سره مخ دي او دمګړۍ د دې ولایت اکثریت ولسوالیو کې د شپې له خوا حاکمیت د وسله والو طالبانو په لاس کې دی. د کابل ښار د څنګلورو ولایتونو وضعیت بیا تر دې هم خراب دی او د میدان وردګو په مرکز میدان ښار او جلریز او نرخ ولسوالیو کې چې د کابل له ولایت سره ګډه پوله لري، طالباني امارت حاکم دی او ټولې فیصلې هغوی کوي. د لوګر د وضعیت هم عین کیسه ده. کله چې کابل ښار د یوې جزیرې په توګه وي چې شاوخوا ټولې سیمې یې پوره نا امنیه او د دښمن تر ولکې لاندې وي، دا به ډېره سخته وي چې په داسې وضعیت کې د ښار د امنیت د تامین هڅې نتیجه ورکړي، ځکه جنایتکاران له وسلهوالو مخالفینو او نورو ترهګرو ډلو سره اړیکې لري او هر قتل او ترور ورته د پیسو په مقابل کې ترسره کوي.
زموږ په باور د کابل ښار د امنیت د ټینګولو لپاره د موجودو هڅو ترڅنګ د شپږنیمو بجو ټیم هڅې دې یو څه نورې هم پراخې شي او د دې ولایت د ولسوالیو په ګډون په څنګلورو ولایتونو کې دې هم امنیتي چارې وڅېړل او داسې عملیات دې وشي چې سیمې د دولت تر بشپړ کنټرول لاندې راوستل شي. هلته دې د بیا رغونې چارې ترسره شي او د سیمو د ولسونو ملاتړ دې خپل کړل شي، غیر له دې هیڅ لاره نه شته، که داسې ونه کړي د کابل ښارایانو هدفي وژنې به همداسې ادامه پیدا کړي او ممکن زیاتې هم شي.
