د افغان دولت د مذاکراتي پلاوي غړي ویلي چې په مطرح شوې اجنډا کې تر اوسه د مؤقت حکومت بحث هیڅ یاد شوی نه دی. رسول طالب زیاته کړې، تر اوسه پورې د مؤقت حکومت بحث نه طالبانو مطرح کړی دی او نه هم کوم بل هېواد. نوموړي ویلي، هغه څه چې د خبرو له مېز څخه د باندې مطرح کېږي تبلیغاتي جنبه لري.
دغه مرکچي ویلي، که چېرته طالبان کومه خبره لري د خبرو پر میز دې له دوی سره په رسمي توګه شریکه کړي، ځکه د ده په خبره دوی د همدې اختلافونو د حل کولو لپاره راټول شوي دي. نوموړی دا څرګندونې وروسته تر هغه کوي چې د طالبانو د سیاسي دفتر مرستیال عباس ستانکزي په مسکو کې له رسنیو سره خبرو کې ویلي وو چې ولسمشر غني د سولې مخالف دی او که چېرته نوموړی له دندې استعفا وکړي دوی هم له اوسني حکومت سره یو ځای کېدو ته تیار دي.
