د افغان سولې لپاره د امریکا خاص استازي د فرهنګي او تاریخي اثارو د ساتنې په خاطر د طالبانو وروستۍ اعلامیه مثبته بللې ده. زلمي خلیلزاد د ازادي راډیو یوه همکار ته په لنډکي پیغام کې لیکلي چې “دا مثبته خبره” ده.
د طالبانو ډلې وړمه ورځ په یوه مفصله اعلامیه کې له خپلو جنګیالیو او ټولو غړو غوښتي چې په افغانستان کې په تاریخي او فرهنګي اثارو پام وکړي. دې اعلامیه کې چې د طالبانو د سیاسي دفتر ویاند محمد نعیم په خپل ټویټر خپره کړې راغلي چې هېڅوک د ځمکې لاندې اثارو د را ایستلو، بهر ته د انتقال او پلور اجازه نهلري.
اعلامیې له طالب جنګیالیو غوښتي چې د زړو کلاوو، منارونو، تاریخي برجونو او ګڼو اثارو په ساتنه کې همکاري وکړي، څو یې د وېجاړېدو او لهمنځه تلو مخه ونیول شي. طالبانو داسې وخت خپلو جنګیالیو ته د افغانستان د فرهنګي او لرغونو اثارو د ساتنې امر کړی چې د طالبانو په دوره کې د دې ډلې د مشر ملا محمد عمر په امر د بودا مجسمې په بمونو ونړول شوې.
د افغان ولسمشر یوه ویاند دوا خان مینهپال په خپل ټویټر لیکلي چې “طالبانو په خپل حاکمیت کې د ملي مصطلحاتو دښمني کړې”. د هغه په خبره “د بودا د مجسمو ورانول د ملي موزیم چور او کرنل امام ته یې سپارل ښې بېلګې دي.”
