«طالبان دې خپلې ټولې غوښتنې او توقعات د خبرو پر میز مطرح کړي، موږ ورباندې هر ډول بحث ته اماده یو.»
د ملي مصالحې عالي شورا رئیس ډاکټر عبدالله عبدالله وايي چې افغان سیاسي مشران دې د سولې په خبرو کې د طالبانو پر وړاندې متحده شي. هغه ویلي چې د سولې په خبرو کې د افغان سیاسي مشرانو د اتحاد وخت رارسیدلی دی.
د مصالحې عالي شورا رئیس له اسوشیتد پرس خبري آژانس سره په ځانګړې مرکه کې خبرداری ورکړی چې که افغان مشران متحد او یوموټی نهشي، نو د یوې ترخې جګړې لپاره دې منتظر اوسي. هغه همدا راز ویلي، که سولې او ثبات په هدف افغان سیاستوالی سره یو نهشي، تاریخ به د موجود وضعیت او د میلیونونو افغانانو د ناهیلۍ په اړه سخت قضاوت وکړي.
نوموړي ویلي چې د بهرنیو ځواکونو له وتلو وروسته وضعیت سخت کیدونکی دی او یو لړ ستونزې به رامنځته شي؛ خو پر طالبانو غږ کوي چې له جګړې لاس واخلي او د سولې د خبرو له طریقه وړاندې لاړ شي.
عبدالله عبدالله طالبانو دا خبرداری هم ورکوي، چې د زور او تاوتریخوالي له طریقه به کله هم واک ته ونه رسیږي. هغه ویلي چې اوس د سیمې هیوادونه او د افغانستان ګاوڼدیان د زور له طریقه واک ته له رسیدلو څخه ملاتړ نه کوي. نوموړی وايي، د طالبانو ډله دې ټولې غوښتنې او توقعات دې د خبرو پر میز مطرح کړي: «موږ ورباندې هر ډول بحث ته پوره اماده یو.»
ډاکټر عبدالله زیاته کړې، چې له دې وروسته باید ټوله پاملره د سولې خبرو باندې معطوفه وي. هغه پر سوله او سیاسي حل باندې د افغانستان د حکومت او د مقابل لوري طالبانو تمرکز هم ګټور بللی. ښاغلی عبدالله وايي: «د سولې یوه پراخ او هر اړخیز توافقه هغه څه دی، چې ټول ورباندې باور لري. خدای مهکړه که سولې ته ونه رسیږو، هیڅوک به د هیواد معاصر تاریخ هیر نه کړي.»
د ملي مصالحې عالي شورا په داسې حال کې د سولې په خبرو کې د طالبانو په مقابل کې د افغان سیاستوالو پر یو کیدو ټینګار لري چې ډیری سیاسي مشران د سولې پروسه کې د ارګ له مداخلې او انحصاري چلند څخه ناراضه دي او ارګ تورنوي چې د سولې په موضوعاتو کې په بې ځایه مداخلې سره دغه بهیر ټکنی کوي.
له دې سره هممهاله داسې نارضایتۍ هم شته چې ګني ارګ سیاستوالو ته اجازه نه ورکوي، څو د سولې په خبرو کې رغنده رول ولوبوي. دا په داسې حال کې ده چې طالبانو په وروستیو کې له افغان سیاسیونو غوښتي چې د حکومت له حضور پرته له دوی سره مخامخ خبرو ته چمتو شي.