په افغانستان کې د امریکایي ځواکونو د نظامي حضور پوره ۱۹ کاله تېرېږي. د امریکا د تاریخ تر ټولو اوږده جګړه چې په میلیاردونو ډالر پرې لګول شوي د امریکا لپاره ډېره درنه تمامه شوې ده. دراپورونه وایي چې امریکا افغان جګړه کې یو تریلیون ډالر مصرف کړي او دغه راز یې ۲۴۰۰ سرتېري وژل شوي دي.
په دې جګړه کې تر ټولو ډېر زیان افغانانو ځانګړې توګه ملکي کسانو لیدلی دی. طالبانو افغانستان کې د امریکایي ځواکونو ۱۹ کلن حضور په اړه خپرې کړې خبرپاڼه کې ویلي، چې امريکا یې په ۲۰۰۱م کال کې د دیپلوماسي غوښتنې په ډېر غرور او ناغیړې رد کړې وې او پر ځای یې خونړي اشغال ته دوام ورکړ چې په زیان یې تمام شوی دی.
د یادونې ده چې د امریکا او طالبانو ترمنځ د شوې هوکړې له مخې، ټاکل شوې د ۲۰۲۱ میلادي کال تر مې میاشتې پورې امریکایي عسکر په بشپړه توګه له افغانستان څخه ووځي.
