د افغانستان مخکیني جمهور رئیس حامد کرزي د دوشنبې په ورځ په افغانستان کې د ناټو سازمان له ملکي سفیر ښاغلي استفانو پونټه کورو سره د خپل کار په دفتر کې وکتل. د حامد کرزي له دفتره په خپره شوې خبرپاڼه کې راغلي چې په دغې کتنه کې د سولې پروسې د وروستیو پرمختګونه او راتلونکو ګامونو په اړه خبرې وشوې.
خبرپاڼه کاږي چې دواړو لوریو د افغانستان د سولې پروسې پر چټکتیا او بریا ټینګار کړی دی. د سولې پروسې پر چټکتیا او بریا په داسې حال کې ټینګار کیږي، چې په وروستیو کې په دوحه کې د سولې خبرې په ټپه دریدلي دي او دواړه لوري د هوکړې له بشپړ عملي کولو په شا شوي دي.
د افغانستان مخکیني ولسمشر حامد کرزی ټینګار لري چې امریکا، افغان دولت او طالبان باید د سولې خبرو ته پوره ژمنتیا ولري او د سولې روانه پروسه باید نتیجې ته ورسوي. نوموړي په افغانستان کې د سولې یوازینۍ لار بین الافغاني خبرې یادوي.
