د افغانستان پخواني ولسمشر حامد کرزي د نوي ښوونيز کال د رارسیدو په درشل کې پر سرپرست حکومت غږ کړی چې د ښوونځيو او پوهنتونونو دروازې دې د افغانستان د لوڼو پر مخ پرانيزي.
نوموړي نن شنبه د کب ۲۷مه پر خپله اېکس پاڼه ليکلي، چې « متأسفانه نژدې درې کاله کیږي چې د گران هیواد نجونې له تعلیم او تحصیله محرومې دي او نشي کولای مکتبونو او پوهنتنونو ته ولاړې شي، علم زده کړي او پدې توگه خپلې کورنۍ او وطن ته خدمت وکړي.»
کرزي د علم زده کړه د هرې انساني ټولنې د بقا، پرمختگ، عزت او له احتیاجه د خلاصېدو لار بللې او له سرپرست حکومت يې غوښتي چې « د ښوونځیو او پوهنتونونو دروازې دې د افغانستان د لوڼو پرمخ پرانیزي، دوی ته دې د ښه تعلیم او پرمختگ زمینه برابره کړي، څو هیواد مو د پردیو له احتیاجه آزاد، پرځان بسیا او د سیالانو سیال شي.»
