په قطر کې د طالبانو د سیاسي دفتر مشر ملا عبدالغني برادر پرون سې شنبه اسلام اباد کې د پاکستان د بهرنیو چارو وزیر شاه محمود قریشي سره وکتل. په دې کتنه کې د طالبانو د پلاوي نور غړي او همدا راز د پاکستان د بهرنیو چارو وزارت چارواکو هم ګډون درلود.
د پاکستان د بهرنیو چارو وزارت په خبره په دې ملاقات طالب پلاوي له ښاغلي قریشي سره د امریکا او طالبانو ترمنځ د سولې هوکړه لیک د عملي کېدو وروستي جزييات شریک کړل او د افغان سولې پر بهیر خبرې وشوې.
د پاکستان د بهرنیو چارو وزارت له لوري رسنیو ته په خپرو شویو دوو ويډيوګانو کې لیدل کېږي چې د طالب پلاوي هرکلي ته په وزارت کې د بهرنیو چارو وزیر شاه محمود قریشي او د ای اېس ای مشر جنرال فیض حمید دواړه ولاړ دي. خو د کورونا وېروس له امله طالب پلاوي ماسکونه اغوستي او لاس په لاس روغبړ یا غېږ نه ورکوي.
تردې وړاندې په قطر کې د طالبانو د سیاسي دفتر ویاند سهیل شاهین هم بي بي سي ته ویلي وو، د دوی پلاوی به په پاکستان کې د دغه هیواد د بهرنیو چارو له وزیر شاه محمود قریشي او د لومړي وزیر عمران خان ترڅنګ د افغانستان لپاره د پاکستان له ځانګړي استازي صادق خان سره ویني.
دغه سفر داسې مهال کېږي، چې د افغان سولې بهیر د دویمې مرحلې بین الافغاني مذاکراتو پیل لاهم نه دی شوی. په قطر کې د امریکا او طالبانو د سولې تر تړون وروسته دغه مذاکرات به په مارچ میاشت کې پېلېدل، خو د بندیانو د خلاصون د ځنډېدو له امله دغه دویمه مرحله لاهم ځنډېدلې ده.
