د جګړو له پای سره سم به افغانان په رښتینې توګه د خپل هېواد واګې په لاس کې واخلي. پخواني ولسمشر حامد کرزي پرون د ملي مصالحې عالي شورا په لومړنۍ غونډه کې د خبرو پر مهال وویل، افغانان سوله غواړي او دا هیله یې باید پوره کړل شي.
هغه وویل چې د ملي مصالحې عالي شورا جوړولو یو غوره اقدام دی او باید ټول غړي یې د سولې د راتګ لپاره هڅې وکړي. حامد کرزي زیاته کړې چې په دوحه کې د بین الافغاني مذاکراتو له دواړو لورو ژر تر ژره یوې هوکړې ته د رسېدو غوښتنه کوي او تمه لري چې دوی په افغانستان کې د جګړو پر ختمولو هوکړې ته سره ورسېږي.
حامد کرزي زیاته کړه چې افغانان دمګړی د یوې پردۍ دسیسې له امله په خونړیو جګړو کې ښکېل دي او همدا چې سوله راځي، نو افغانان به په رښتینې توګه د خپل هېواد واګې په لاس کې واخلي.
نوموړي همدا راز د خپلو خبرو په اوږدو کې وویل چې د افغانستان د سولې پروسه او دغه راز په دوحه کې د افغان حکومت مذاکراتي پلاوي له پرېکړو او دريځ ملاتړ کوي او په دې برخه کې هر ډول همکارۍ ته تیار دی.
