د ملګرو ملتونو د بشري مرستو د همغږۍ اداره یا اوچا وايي، په روان ۲۰۲۴ کال کې به ۲۳٫۷ میلیونه افغانان مرستو ته اړ وي چې د دغه شمېر تر نیمايي ډېر يې نجونې او مېرمنې دي.
دغه بنسټ ویلي چې په تېر ۲۰۲۳ کال کې يې هم اته مېلیونه نجونو او څه باندې نهه میلیونو ښځو ته حیاتي مرستې ورکړې.
یاد بنسټ له افغان ښځو او نجونو سره د درېدو غوښتنه کړې او ټینګار یې کړی چې دوی په اغېزمنو شوو کې تر نورو ډېرې زیانمنېدونکې دي.
تازه، د ملګرو ملتونو د خوړو او کرنې بنسټ یا فاؤ د یوه تازه راپور موندنې هم ښيي چې اقليمي بدلون په تېره بیا کلیوال بې وزلي، په تېره بیا ښځې او ځوانان په ګڼو هېوادونو کې په ډېرېدونکي ډول ځپلي.
دغه راپور موندلې چې د اقلیم بدلون اغېزې بې وزلي تر منځني او ښه عاید لرونکو کورنیو ډېر ځپي. د دغه بنسټ تازه راپور وايي چې سېلابونه د بې وزلې او هغو کورنیو تر منځ واټن لا ډېر په چټکۍ پراخوي چې لا بې وزلۍ نه دي ځپلي.
په دغه راپور کې په افغانستان کې د خوړو پر امنیت د تکرارېدونکو وچکالیو اغېز هم ډېر ویجاړوونکی بلل شوی.
د ملګرو ملتونو د ښځو برخې هم ليکلي چې د بشري بحرانونو په سختېدو سره باید مرستندویان ښځې هېرې نه کړي.
دغه بنسټ په تېر کال کې لس مېلیونو افغانانو ته د ملګرو ملتونو د نقدي مرستو پرې کېدو ته هم اشاره کړې او لیکلي يې دي چې دغې پرېکړې هم افغان مېرمنې زیانمنې کړې.
دغې ادارې په کار او پرېکړو کې د افغان ښځو محرومېدل هم د افغانستان اقتصاد ته بله ضربه ګڼلې.
سرچینه: پښتو بي بي سي
